Prezident İlham Əliyev: Azərbaycan xalqı Pakistanın qardaşcasına münasibətini yüksək qiymətləndirir

Biz Pakistana çox minnətdarıq ki, Azərbaycan torpaqlarını işğal etdiyinə görə Ermənistanı tanımadı və Ermənistanla diplomatik əlaqələr qurmadı. Bu, qardaşlığın göstəricisidir. Azərbaycan xalqı bu qardaşcasına yanaşmanı yüksək qiymətləndirir.

AZƏRTAC xəbər verir ki, bu fikirləri Azərbaycan Prezidenti İlham Əliyev Pakistanın Baş naziri Məhəmməd Nəvaz Şərif ilə görüşündən sonra mətbuata bəyanatında qeyd edib.

Prezident deyib: “Biz, həmçinin minnətdarıq ki, 2012-ci ildə Pakistan Senatı Xocalı soyqırımını rəsmi olaraq soyqırımı kimi tanıdı. Bu, dostluq və tərəfdaşlığın daha bir göstəricisidir. Ona görə də Azərbaycan xalqı Sizin ölkəni sevir. Biz bu dəstəyə görə çox minnətdarıq və öz tərəfimizdən hər zaman hər məsələdə sizi dəstəkləyirik”.

Siyasi təmasların çox yüksək səviyyədə olduğunu vurğulayan dövlət başçısı deyib ki, Azərbaycan və Pakistan beynəlxalq təşkilatlarda da bir-birini dəstəkləyir.